Occitan     

Poésie occitane de Yves Fouilhé

(2éme prix à un concours régional)

 

Lo raton acomplit

 

Fasiá jà plan de temps quand moriguèt lo paire

Que la maire soleta passava sas velhadas

Mai que mai legissiá sens faire mai de bruch

Que de virar los fuèlhs totas las tres minutas

S'installava aital l'atmosfèr' adeqüada

Qu'esperava lo rat per se manifestar

Sens bolegar lo cap, espiant de coga d'uèlh,

Ela lo seguissiá mentre qu'el inspectava,

Cercava en primièr quicomet per manjar.

L'ostessa prenguèt lèu lo biais de semenar

quauques micas de pan e bocinets de frucha

per tal d'encoratjar lo pichon rasimaire.

Lo coamelejaire aprenguèt los ròdols

Un còp son sopat fach li laissava lo temps

De pagar son escòt en convivialitat.

Entre sos dos genolhs ma maire vesiá ben

L'animal assetat de còps quilhar la tèsta

Sens càp de prevencion la plan desvisatjar.

Quand n'aviá son sadol o quauque rendètz-vos

Se'n anava suau per un trauc jos la placa

E laissava ma maire amé la patz al còr.

 

1 Istòria vertadièra.

 

N'ai una autra que te semblariá tanben improbable e que ça-que-la ai vista de mos uèlhs : un mascle cat qu'aprochava de vint ans e que li demorava que la pèl suls òsses, nonó de tres o quatre catons abandonats, s'apiejavan contra el qu'òm auriá dich una piramida ambulanta quand avièm l'astrada de los veire en tropa de còps que i aviá quand venián pregar per manjar dabans la fenèstra de mon filh dins la campanha lemosina. E te pòdi assegurar qu'aquò es pas inventat. La del raton l'ai pas viscuda ieu. Es ma maire que me l'a contada mai d'un còp.

Lo acomplit del títol es en referéncia al complido espanhòl, un adjectiu qu'aimi fòrça que reconeis al rat totas las qualitats cavalierescas. Ara sabi pas se fa lo meteis efièch en occitan.

 

2 S'installava aital l'atmosfèr' adeqüada un pauc prosaïc aquí tanben

 

3 Voliái quicòm que donèsse una impression de rigor, de processús metodic, a la Sherlock Holmes, per sotalinhar la circonspeccion del rat